ألا سحقاً للخمة

ألا سحقاً ........ للخّمة

السلام عليكم ورحمة الله وبركاته ..

في موضوع كان ودي اتكلم فيه من زمان بس .. 

ما ودي أغث نفسي وأغثكم معاي .. 

بس شسوي لازم أقوله علشان افضفض ... 

وهم أكون ناقل خبرة يمكن تستفيدون منها ..

المهم موضوعي اليوم عن ناس .. ما لهم من الأسامي عندي إلا الخمة .. 

والخمة بالنسبة لي أنواع يعني في منهم اللي يتعمد يطلعك على خطأ مو علشان كلامك فعلاً خطأ لا يطلع خطأ علشان بعدين اذا قلت رايك الصريح فيه يقول عنك هذا انسان يخطأ على طول .. يعني تشويه سمعة فقط... هذا النوع الأول .

النوع الثاني يكون عادة إنسان شايف نفسة حيل حيل بدرجة مو طبيعية .. وتلقاه يتكلم بكل موضوع ويفهم بكل شي واذا طرحت إنت موضوع معين غصب طيب يحاول إنه يصحح فيه حتى لو كان خالي من العيوب .. يعيد صياغة موضوع علشان يكون بالصورة .. وبخبرتي بعلم النفس .. هذا إنسان فاضي من الداخل ويحاول إثبات وجود لا أكثر ولا أقل.

النوع الثالث هذا ما أدري شقول عنه .. إنسان بو شخصيتين .. يعني لما تكلمة بالنت تلقاه إنسان ولما تشوفه على الطبيعة تلقاه واحد ثاني .. شخصية طبيعية اللي اهو عليها وشخصية ثانية اللي بالنت .. واللي بالنت اهي غالباً ما تكون الشخصية اللي وده أنه يكون ( يعني بعلم النفس شخصية الأنا المثالي ) هذا ما منه خوف .. تلقاه ملسون بالنت وعلى الطبيعة ضعيف شخصية ولا يعرف يتكلم .. وعادة ردودة تكون مهزوزة .

النوع الثالث اهو النوع النذل (هههههههه) عجبتني وقاحتي هالمرة ... هذا انسان متطلب كثيراً يطلب منك وعلى كثر ما تعطيه ما يبين بعينه وفوق كل هذا لما تسويله شي يجيك بعد مدة ويقول لك ان في شخص سواله نفس اللي سويت له بس الثاني أحسن منك ( جنه يقول ترا مالك فضل علي ) .. 

مثال علشان لا احد يخوره بالتفسير :

احمد طلب مني اعطيه قلم وعطيته .. يرجع احمد ويقول لي ترا خالد عطاني قلم احسن من قلمك (شلون أحسن يعني يكتب بروحة مثلاً ؟؟ ) المهم الشخصية هذه فعلاً نذلة ونصيحتي إنك ما تجادلها لأنها دايماً بتطلع غلط .. أشتر راحتك .

النوع الرابع نوعية طيبة جداً جداً ملاك .. حبيب محترم .. فاهم دارس عاقل متفهم يقدر الآخرين متواضع ماكو أحسن منه. ما يغلط ... هذه طبعاً الصفات اللي يشوفها بنفسه .. والناس الثانية تشوفه على حقيقته طبعاً هذا الانسان لازم انك توخر عنه بسرعة لأنه غالباً يضرك وهو حاط في باله انه يفيدك .. نظراً للأمور فوق تحت . غبي ويدعي الذكاء. مشكلة انه ما يدري إن الناس تشوفه على عكس اللي يشوف نفسه فيه .

النوع الخامس هم بعد حبيب وطيب ولما تشوفه بروحة تقول عنه ذهبه وخووش رجال ما يرد لك طلب وتحطه على يمناك .. مشكلته الوحيدة إنه يقعد مع الخمة والناس صعب تفرق بينه وبينهم وما ودك تحتك معاه لأنه الخمة اللي معاه راح يخلونه يكرهك أو يخلونك تكره .. لما يفج عن الخمة ويكون بروحة هذيك الساعة احتك فيه لأنه حبيب جداً .

النوع السادس نقاد وعنده كل شي مو زين حتى الاشياء اللي واضحة للعيان انها زينه بس لأ دام انها مو عند أحد الناس اللي يشوفهم قدوة .. تكون مو زينة .. ماله داعي تتعب نفسك مع هالنوع من الخمة لانه الجدال عقيم وبيزنطي وما يجيب ضنى .

النوع السابع هذا نوع مليق وتافه يمشي ويقييم الناس ويسألك أسأله سخيفة وينقد على اجاباتك وما يشوفك بالعين شي ويحاول يبين للكل إنه اهو أفضل واحد وفيه رؤية فوقية للناس بشكل مو طبيعي .. وما يعطي من نفسه كلشش .. ولما تشوف ماضيه تلقاه بدون ربع لزقة بالناس اللي وده يصير نفسهم بس اهم سافهينه لأنه مو كفو حشيمة. ويا كثر ما يتشيحط .. ماله حل إلا إنك تطقه وتخليه يجبي علشان اذا شافك مرة ثانية ينحاش .

النوع الثامن هو النوع اللي فيه منه واجد واجد (بهات بهات) بالدواوين نوع مزعج وكل ما تقول موضوع وتخلص يعقب على موضوع ويا ليت يقول إنا سمعت ان كذا وكذا .. 

لا يقول إنا رايي بالموضوع ويجيب أمثلة من ـ ـ ـ ـ مخه .. 

طيب السالفة سالفتي والموضوع موضوع وانا طارحه من بابا إعطاء معلومة .. 

ماني ملزوم فيك وبرايك ..

رايك خله لك واستريح شوي .. هالنوعية لازم تندقر ولا يتمادى.

النوع التاسع هالدايخ من أنواع الخمة مصيبة .. تلقاه يتكلم بالمواجيب والمرجلة وكل ما قالو الناس سالفة دخل فيها الرجولة والمرجلة والصح إن الواحد يسوي جذي (ومن المرجلة أن تقوم بكذا وكذا) ولما تبين موقف الرجولة الصجية تلقاه بعيد كل البعد عن الرجولة وما يشم ريحتها كلش .. هالنوعية غالباً ما تكون تسمع عن الرجولة وتقرا عنها أو حتى امه تسولف له عنها .. بس ما عمره مارسها .

أخر نوع برأيي النوع العاشر وهو النوع اللي ينقال عنه المثل (يطرون من الحافي نعال) أو (ينطرون من الديج بيضة) أو (نقوله ثور ويقول أحلبه) هالنوع أذية ومشكلة بحد ذاته يحاول أن يستفيد من كل شي بقعدته .. يعني مثلاً اذا بتطلبون من مطعم وأهو مو مشتيهه يحاول يطلع عيوب بالمطعم يخليك تكره المطعم علشان ما تطلب منه ويتدور مطعم على مشتاهته الحال معه إنك تطلب اللي تبيه وتخليه يولي جنه مو موجود لأنه غثيث .. 

ولا تناقشة لانه مثل باجي الخمة راح يحاول بكل الطرق يطلعك غلطان.

في النهاية يا أخواني أتمنى إني ما غثيتكم .. ولو إني أنغيت بمجرد ما كتبت هالكلام .. بس أتمنى إني أكون وضحت لكم نظرتي للخمة واتمنى إنكم تستفيدون منها ... 

وقبل ما تتعاملون مع أي نوع من هالانواع أتمنى إنكم تتذكرون المثل اللي يقول :

( الطيب ما يبين بالردي ) والمثل الثاني ( لا تجادل الأحمق فقد يختلف الناس بالتفريق بينكما ).

هذا رايي الكاتب .. بالخمة واتمنى إن ما يطلع له أحد ويقول له : انت شفهمك بالناس .. وليش ما ليش .. هذا رايه واتمنى إنه يحترم

أشهر العقد النفسية

أشهر العقد النفسية

العقد النفسية Psyco - complex

هي فكرة او مجموعة مترابطة من الافكار ، المكبوتة كلياً أو جزئياً ، تصبغها العواطف بشدة، وفي صراع مع غيرها من الأفكار أو مجموعات الافكار المقبولة من الفرد.

وقد تنشأ العقدة من صدمة إنفعالية واحدة أو أكثر ، أو من تربية شديدة في الطفولة، كأن يشعر على الدوام بأنه مذنب في كل ما يفعل . هذه التربية من شأنها أن تنشىء في نفسه مشاعر بالنقص والذنب والقلق والغيرة أو عواطف هدامة كالحقد والكراهية، لا تلبث أن تكبت فتنشأ عنها عقدة أو أكثر .

1. عقدة إليكترا : Father - complex

عقدة إليكترا ، عقدة الأب عند البنات، ويقابلها عقدة اوديب عند الصبيان، وهي تعلق البنت وارتباطها بأبيها، وعداؤها لأمها . وذلك لان البنت تمر في السن من 4 الى 6 سنوات بمرحلة تبحث فيها عن الإشباع الوجداني المتخيل عن طريق موضوع. وأهم الموضوعات الموجودة حولها في تلك السن هي الأبوان، فتتعلق البنت بالأب ، وترى في الام منافساً لها في ابيها، لكنها تكبت هذا الصراع إزاء تهديدات الأبوين لها .

واليكترا كانت ابنة أجاممنون ، أحبت أباها وعادت أمها ، وحرضت اخاها على قتل الأم .

2. عقدة أوديب : Mother complex

عقدة أوديب، عقدة الأم: يحدث للطفل خلال السنوات الاربع الأولى من حياته تحول من النرجسية إلى الإشباع الموضوعي المتخيل. ويرتبط الطفل الذكر بأمه وينظر لأبيه كمنافس ، لكنه يضطر إلى كبت هذا الصراع الأوديبي نتيجة تهديدات الأب له بإخصائه، تليمحاً أو تصريحا ً.ارتباطه بوالدته وحبه لها مشوب بدوافع جنسية حتى أنه يغار عليها من اي دخيل ، لذا تأخذ بوادر العزوف عن أبيه والإعراض عنه تدب في نفسه وتبدو في سلوكه.

والطفل -ككل محب- لا يحب أن يكون له شريك فيمن يحب ، بل وتأخذه الغيرة ممن ينافسه في هذا الحب. بل يأخذه الغيظ على كل من يعتدي على "حقه" في هذا الحب لكنه غيظ يولد في نفسه الخوف من بطش أبيه، كما يقترن في نفسه الشعور بالنقص والشعور بالذنب لما يحمله نحو ابيه من نيات آثمة. هذا التناقض في المشاعر بين حبه لوالدته والتعلق بها وخوفه من أبيه والرغبة في استبعاده بالموت، هذا التناقض عبارة عن عواطف ومشاعر سلبيه يلفها الكبت فتتكون من ذلك "عقدة أوديب".

 3.عقدة ديانا Diana complex

عقدة نقص تدفع المرأة إلى التفوق والتصرف والسلوك كرجل.

وديانا في الأسطورة، عذراء لم يمسسها أحد من الذكور، وكانت تتصرف كذكر ، فكانت تتقرب للنساء وتساعدهن في الولادة وتحمي الصغار . وكانت تفاخر بعذريتها ، وتترفع على الجنس ، وترتدي ملابس الذكور ، ولا تُرى إلا قابضة على قوس وسهام.

 4.عقدة النقص Inferiority complex

هي استعداد لا شعوري مكبوت ، أي أن الشخص لا يفطن إلى وجوده. وينشأ من تعرض الشخص لمواقف كثيرة متكررة تشعره بالعجز وقلة الحيلة والفشل، ومتى ما اشتدت وطأة هذا الشعور على الشخص مال إلى كبته، أي الى انكسار وجوده، بل وإلى عدم الإعتراف بما لديه من عيوب فعلية. غير أن كل ما يذكره بالنقص يحمله بتلقائية على الدفاع عن نفسه.

ومن سمات الشخص المصاب بعقدة النقص : العدوان والإستعلاء والزهو الشديد والتظاهر بالشجاعة والمبالغة في تقدير الذات . وقد يحاول لفت الأنتباه إليه بالتفاخر الكاذب والتباهي الزائف والاختلاق والكذب أو التأنق غير المحتشم في الملبس او التحذلق في الكلام.

ومن العوامل التي تلهب الشعور بالنقص لدى الطفل وتحيله إلى عقدة نقص ، أن يكون بالطفل عيب أو عاهة جسدية تجعله قاصراً بالقياس إلى غيره، أو أن يفشل في مدرسته بعد فترة نجاح.

 5.عقدة الذنْب Guilt complex

عقدة الذنب حالة تختلف عن حالة الشعور بالذنب . فالأخيرة ناتجة عن قيام الشخص بعمل معين لا يرضاه ضميره، أما عقدة الذنب فهي شعور مطلق غير واضح المصدر بالذنب ، تؤدي بصاحبها إلى استصغار الذات وتحقيرها ، فيشعر بأنه مذنب حتى لو لو يقم بعمل يستدعي ذلك، ويرى في ابسط أخطائه ذنوباً لا تغتفر . وفي هذه الحالة يشعر أنه بحاجة إلى إنزال العقاب بنفسه إلتماساً للراحة. وسبب ذلك أن الإنسان نشأ وتعود أن المذنب متى حلّ به العقاب فقد كفَّر عن ذنبه. 

إن مَن يعاني من عقدة ذنب يندفع من تلقاء نفسه، تدفعه حاجة لا شعورية إلى عقاب نفسه ، سواء كان هذا العقاب مادياَ أو معنوياَ وذلك بالتورط وتكرار الافعال التي تضر بجسمه أو ممتلكاته أو سمعته أو عمله، فيورِّط نفسه _ عن غير قصد ظاهر منه_ في متاعب ومشاكل وصعوبات مالية أو مهنية أو عائلية أو صحية لا يناله منها إلا التعب والمشقة والعذاب . بل قد يستفز عدوان الغير عليه أو عدوان المجتمع بارتكاب جريمة . فإذا حلَّ به العقاب هدأت نفسه وزال عنه ما يغشاه من توتر أليم. مِن هؤلاء مَن يدمن المخدرات أو يتهاون في رعاية صحته، أو يتغافل عن انتهاز الفرص التي تفيده، أو يتكاسل في عمله أو يتقبل الإهانات دون دفاع عن نفسه، والإنتحار أقصى حالات عقاب الذات.

وتنشأ عقدة الذنب من ضمير صارم ورغبات محرمة مكبوتة ككراهية الاب او الأخ أو اشتهاء بعض المحارم أو الغيرة من أخ أصغر. والإسراف في لوم الطفل وتأنيبه وعقابه وإشعاره بالذنب من كل ما يفعل، أو الإمعان في تهويل أخطائه مما يؤدي إلى تضخم في تكوين ضميره ، فإذا بهذا الضمير الصارم يحاسب الفرد في الكبر على الهفوة الصغيرة ويعاقبه على أدنى الأمور ويجعله شديد الحساب لنفسه والناس، شديد السخط على ما يفعله .

مما رأيت في تويتر

مما رأيت في تويتر

منقول من أحد المدونات

السلام عليكم .. هلا بالحبايب

اليوم حاب اسولف لكم واقول لكم عن اللي شفته بالتويتر

أول شي .. من رايي التويتر انه خوووش موقع يساعد على تناقل الأخبار بسرعة موو طبيعية مثلاً : لما ضاع الولد المصاب بالتوحد قبل فترة بدأو الناس يعلنون عن فقدان الولد وقاموا يسوون ريتويت لما انتشر الخبر خلال ساعات ولما لقوه حتى الخبر بالجريدة ثاني يوم وبالتأكيد كان الخبر بايت

الاخبار بالتويتر ميزتها أنها تنوخذ من المصدر نفسه يعني الناس الي مسوين حق نائب أو ممثل أو مطرب أو حتى لاعب فولو راح يآخذون علومه دايركت منه

الغريب في التويتر إن في أنواااع وبلاوي من الناس اللي مسويه حسابات ومآخذه الموضوع تحدي

في ناس شغالة سب وشتم ولعنة خير ..

وفي ناس تشتغل على الريتويت .. 

وفي ناس ما عندها سالفه وتتشرط على العالم وتقول اللي مايسولي فولو ما راح اسويله فولو .. 

انت انطق بالاول اكتب شي قوول شي .. 

طاااخ وساكت موجودة باللستة زيادة عدد بس

وفي ناس تقهر .. 

تكتب حكم ومواعظ لما تقرا كلامه .. تقول هذا وين اللي مسوين منهج كتب الفلسفة عنه .. 

ولما تقعد معاه تكتشف إنه إنسان فاضي من داخل ولا يرى أبعد من أنفه.

وناس تحاول تثبت إنها شخصية مهمة وتتكلم بكل ثقة أن رايها اهو الصح وغيري غلط .. وأكيد بعد في ناس تغث واذا شافتك بدوانية تقول لك سولي فولو .. وإن سويت لهم فولو تنطر يوم يومين اسبوع علشان يسوون لك فولو .. تنصدم انهم مو معبرينك .. الحل مع هالاشكال على طووول بلوك مو بس ان فولو

البنات بالتويتر عاد حالة خاصة تدز لك رسالة تقولك اشكرة بالبنط العريض لو سمحت سولي فولو وتعطيها طاف .. وترد تحن عليك سولي فولو .. وان اقتنعت وسويت لها فولو .. صفحتك تنترس بكتاباتها السخيفة

مرة تكتب ان اللي ما يحبها هذا انسان تافهه ولا يقدر اهميتها واذا جرب غيرها راح يعرف انها كانت جوهرة

ومرة تكتب بعبارات مختلفة تلمح ان اهي احسن وحدة بالعالم .. 

ومرة تحط صورة خشمها ومرة .. ولا خلوني ساكت

.

في ناس بالتويتر تكتب اي شيي ..علشان تزيد التويتر مالها .. تكتب كلمات مثل .. (قاعدين) او يحط ابتسامة .

 

وفي مرة واحد كتب بالتويتر مقولة اعجبتني حيل حيل ..

رواد تويتر عادة

من الساعة 4 الفجر لي 8 الصبح يكتبون اذكارة وادعية

من الساعة 8 الصبح لي 12 الظهر يذكرون اللي صار معاهم امس

من 12 الظهر لي 4 العصر يسألون وين نتغدى

من 4 العصر لي 10 بالليل سياسيين من الدرجة الاولى

من 10 بالليل لي 4 الفجر شعراء مخضرمين

وسلم لي على الناس اللي خلت التويتر نفس الاي ار سي دايرينة شات ومحادثة

من رأيي التويتر حق الناس اللي تستاهل ان الواحد يتابعها مو حق كلمن هب ودب .. واحنا طبعاً مع الخير يا شقرا