مغامرة عند طبيب الأسنان
باللهجة العراقية
وحياكم الله من جديد وجديد حياكم الله ومن جديد موقف جديد في واحد تزوج وبعد فترة فجابوا اطفال جدد .. المهم ..
القصة يااخوان ويااخوات ماصايرة قبل .. ويمكن صايره بس مادري شمدريني قابل اني اعرف بالناس .. وحدة راحت لطبيب الأسنان وتقول قصتها :
رحت لطبيب الاسنان يوم الاثنين اني وبنت خالتي نورعلمود فد سن صارله قرن وكم يوم خايس خيسه بس الله يعلم بيها جان محشى قوزي وتمن اقصد محشى ومسويته عد غير طبيب ..
بس هذا الطبيب طلع كلش يفتهم بحيث الحشوة وكعت ورى سنة وانته تعرفون شنو معناها وماطول عليكم بالسالفه رحت للمستوصف من خلص وكت الدوام مبقاله غير نص ساعه يمكن يمكن انطردنه طرده نازكه بعدين بس شلون مندري
المهم دخلنه للطبيب وكعدت بنت خالتي على صفحة تكول ويه نفسها الله يساعدها البنيه يارب متتاذى هاي لو اخوها محمد الحديثي جان يكول حيل وزايد وياريت بعد اكثر المهم بنت خالتي كلش فقيره بحيث يمكن كامت تضحك عليه بكلبها وابن خالتي كلما يسمع اني تاذيت يهلهل
المهم جا الطبيب وجتي الابره وياه بس مو اي ابره
انها الابره الاولى للتبنيج لان حضرت جنابي مكتفيت بوحده وهسه تفتهمون السالفه
وعلى فكرة الابره مو مثل متضنون ابره رقيقه
بنجني وكلي تعاي فد شويه
ومرت الفد شويه وطبيتله كلي تبنجتي
فاني قشمرت عليه وكتله اي يعني عيب نفشل الرجال
والصراحه اني ماعرف شنو التبنيج
المهم اجه الطبيب واجت البرينه وياه ونزلت بتمي بالعربي الفصيح فمي وبالعراقي الجلفي حلكي
والطفره وصلت للعبدلي ولو اني ماعرف وين صاير بيت العبدلي
واصلا انتو تعرفون منوه العبدلي
اني اكللكم هذا مخرج باذاعة دار السلام
هاي شودانه هناك خوش خل نرجع
فالطبيب كلي موكتلج تبنجتي لو لا كتله شون يعني
كلي لازم الشفه تتبنج فكتله خوش جان شيصير ؟؟؟
الابره الثانية كالاسد نزلت بفمي الي تعرفون قصته شنو ورحت طلعت بالانتظار هنا يله عرفت شنو فائدة التبنيج
جنت اكلها لنور هو السن مو عظم ليش ديتبنج جان تكلي ليش انتي ضكتيها هذا العظم مالج
وراها خلص الانتظار وطبيت للطبيب كتله تره متبنجت الشفه
كال معقووووووول خاف نوع العصب مالج مو مثل الباقين
كتله لا مو بنجني غير طبيب وتبنجت ؟؟؟
بيني وبينكم عبالي هذا الطبيب كلشي ميفتهم وميعرف وين يضرب الابره
بس تره طلع طبيب خرافي وشغله مرتب عود ادليكم عليه
فالمهم جتي الابره الثالثه مستحمل الرجال الدوام خلص واحنه عاصين بالعياده والمراقب كلسع يكللنه مخلصتوا مخلصتوا
وطبعا هاي الابره حالها حال الباقين مفادت
وهذا حال الي يروح طبيب الاسنان
فهو بعد ان يأس كالي راح احطلج مؤقته وتعالي يوم الاربعاء
لان على هاي الابره التلاثه راح يبقى البنج عندج لساعه 12 بالليل
وصراحه يااخوان بقة اكثر من الـ 12 بحيث اشرب المي الجهة اليمنه مبنجة واليسرى ممبنجه
من اشرب مي الجهة اليمنة تخر واليسرة تضب
وحلكي صار نافورة وعلى هلمنوال للصبح
انتظرت الى ان جاء يوم الاربعاء الي هو اليوم
وامي خلتني اروح قبل مايفتح المستوصف لان كلتلي اكو واحد يروح بانتهاء الدوام فغصبا عني رحت
وبنص الحر ساعه 3 ونص وشكم دقايق وبالفعل المستوصف ممفتح
انتظرت شويه لحد مازهكت روحي بهل الحر كلت اروح ارجع للبيت
احسن
وبطريق الرجعة شفت احد اطباء المجمع بالطريق بسيارته جان كبل اطفر واهرول للمجمع
وكصيت الباص ومن شافني المراقب اخترع تذكر شون خليته ينتظر للسبعه المغرب كال شعجب جيتي من وكت
كتله مو مخلص سني علنص كال يله زين تسوين جيتي من وكت
وطبعا ابن خالتي من عرف اني انتظرت بالحر
كال لو اعرف انتي انتظرتي بالحر
جان
جان
جان
جان
جان
جان
جان
كلشي مسويت
المهم
رحت هلمرة ويه البابا وبنت خالتي ودخلنه وكلي ذاك اليوم متبنجتي من رجعتي
كتله اصلا المي كام يخر من حلكي من ورى البنج فابتسم
وجتي ابرته المحترمه وراها وهم انتظرت شويه
وطبيت وصراحة يامستمعينا الكرام بيني وبينكم
هم متبنجت الرجال طلعت روحه ووصلت لخشمه وقرر ينتقم
فطلعلي اكبر ابره بالمستوصف كال هاي تاثيرها كلشي قوي مو مثل باقي الابر
كلي هاي مفعولها مو مثل البقيه هاي مفعولها كلش قوي
بهاي اللحظة نسيت خوفي من الابر لاني مداتبنج ابددددد
وتالي متالي الحمد لله هاي الابره يلا بنجتني
يعني ميفيد معي الا دبل فاليوم دبل ابره
ومااحجيلكم فمي تزرف تزريـــــــــف ولا الدريل
بس الحمد لله بالاخير صار سني وشيعي وياه همين
وعاش عيشه سعيده
على فكره القصة حقيقية ومابيها اي تحريف
بس شويه سويتها بطريقة فكاهية ولو تدرون
هسه سني شون ديوجعني ولثتي مورمه
واتاذى شوي من اكل
بس ان شاء الله
ترجع الامور لمجاريها
ساعد في الاخراج
واحد من الناس
ليست هناك تعليقات:
إرسال تعليق