تحليل شخصيه سويته ( استهبالي طبعا ) للمتعه.. اختاروا شي واحد مفضل من الموجود بالرسمه
.. اقضب ارضك الله يهديك..
الشخصية الكوكيزيه:انت انسان هااادي متصالح مع نفسك تحب النهار وتكتئب بالليل معرف ليه !! اصحابك قليل بس يكفون ويوفون 
.. تحب تلبس اكبر من قياسك الله يصلحك ..وعندك مشكلة مع الاتجهات تلخبط بين اليمين واليسار لازم تسوي نفسك تاكل عشان يبين معك اليمين فين .. تحب السفر وماعندك مشكله تسافر لحالك تقوم الفجر تتمشى وتفطر وتتسوق والمغرب وانت نايم ( خسارة فيك التذاكر) 
.. قلبك صافي وتراعي مشاعر الناس بشكل جميل وبالمقابل حساس جدا لكن ماتطول زعل اي شي يرضيك .. تحب الاكل وماعندك مشكله تاكل اي شي وبأي وقت يعني تفطر رز ولحمة من الثلاجه بدون تسخين وتاكلها وانت راضي عن نفسك
الشخصيه الماكرونيه:انت انيق وراقي ودقيق بمواعيدك وحريص بكل شي حريص باختيارك لاصحابك و حريص على مصاريفك وكل شي الحاجه الغريبه على كثر حرصك عادي تشتري اشياء ماتبغاها وتنركن عندك بالدولاب.. و مشكلتك الهياط العجيييب 
لدرجة وصلت تهايط على اغراض اهل زوجة عم جاركم .. .
واتمنى تكتفي الهياط باغراضك واذا مره يعني هاه يحكك لسانك معليش نسمح لك تضم اهلك لـ اللسته
.
الشخصية الدوناتيه:انت عجول الله يصلحك و راعي هذرة وسوالفك مكرره يعني لازم بكل جلسه تنسمع كم قصه من قصصك اللي كلها بهارات .. الجميل انك شجاااع بالقول والفعل 
.. اصحابك كثير على انك مزاجي .. من النوع اللي يمشي وهو يحلم تطبخ وتغسل وتذاكر وكله وانت نااايم .. اصحابك يتمنونك تنام عندهم عشان تخلص لهم امورهم بدون هذرة بس كاشفهم وما تنام الا بغرفتك وانت قافل الباب
.. تحب النوم وتنام في اي وقت واي مكان ولا يفرق معاك شي والغريب انك تقوم وانت رايق بعد 
.. ماعندك مشاكل مع الناس.. ميزتك لامبالي وذكي
الشخصيه المعموليه:انت كريم جدا و اجتماعي تحب المناسبات بكل انواعها .. وصاحب مباديء .. تكره النقاشات وتسوي اللي يريحك وكلام الناس دايما مايفرق معاك .. حنون ويسمونك ( ام – ابو / دميعه ) 
مع انك تحاول دايما ماتبكي عند احد بس مكشوف من خشمك الاحمر ..
ليست هناك تعليقات:
إرسال تعليق